Lánini skulu gjaldast ov skjótt aftur

Føroyska afturgjaldstítíðin er 2,6 ár og nógv styttri enn hjá øðrum londum. Stuttfreistaðu lánini gera, at Føroyar noyðast oftari at taka nýggj lán, og tað hevur størri váða við sær.

Landskassaskuldin, 4,6 milliardir krónur, er fimm láns­bræva­røðir. Tríggjar eru fimm ára lán, eitt er seks ára lán og eitt er 15 ára lán. 

Øll lánini eru standandi. Tað er, at bara renta, eingir av­dráttir, verður gold­in í lánstíðini. 

Alt í einum

Lánið verður goldið aftur í einum, tá láns­tíðin er farin. Landsbankin sigur, at langfreistaðu lánini eru dýrari, men tryggari, tí við teimum er minni ivi um komandi lánsútreiðslur. 

Við stuttfreistaðum lánum er vandin við brádligum rentuhækkingum størri, og tí kann hetta gerast dýrari sum frá líður. 

Í løtuni er rentan metlág, og tí er hetta eitt gylt høvi hjá landinum at taka lang lán. Tað hevði tryggjað eina lága rentu og lægri lánsútreiðslur næstu árini, sigur Landsbankin.

Í juni

Næsta lánið hjá landskassanum, sum er 1,1 milliard krónur fellur til gjald­ingar í juni.

Gjaldførið hjá lands­kassa­num er í løtuni væl størri en kravda minsta­gjald­førið, sum er 15 prosent av bruttotjóðarúrtøkuni.

Tí verður ikki neyðugt at endur­fíggja alla upp­hædd­ina, 1,1 milliard krónur í juni, og tí rindar lands­kassin nakað av skuld niður.