Evropeiski miðbankin heldur rentuni niðri

Lága rentan hjá Evropeiska miðbankanum, EBC, kemur eisini væl við hjá Føroyum, hóast Føroyar ikki brúka evruna sum gjaldoyra.

Landsbankin sigur, at lágt búskaparligt virksemi í evrulondunum ger, at rentan er lág. Og nógv evrulond hava lutfalsliga stóra skuld. Evrulondini eru londini, sum brúka evruna sum gjaldoyra.

Evropeiski miðbankin heldur rentustiginum niðri fyri at stimbra virksemið í evrulondunum og fyri at lætta um skuldarbyrðuna hjá mest skuldartyngdu londunum. 

Rentan tvey prosentstig minni

ECB hevur keypt tí lánsbrøv fyri nógvar pengar. Hetta hevur økt um pengamongdina á evrumarknaðinum seinastu árini, og soleiðis verður rentan trýst niður.

Rentan, sum Føroyar rinda fyri lán, er minkað nógv seinastu átta árini. Rentan hjá landskassanum var triðingin størri í 2011 enn hon er nú. Hon var líka yvir trimum prosentum í 2011. Nú er hon stívliga eitt prosent. 

Landið skyldar 4,6 milliardir krónur, og var rentan nú tann sama sum hon var í 2011, kostaði hon landskassanum 90 milliónir krónur meira, sigur Landsbankin.

Og Føroyar kunnu tryggja sær eina lága rentu í nógv ár, um landsstýrið tekur fleiri langfreistað lán, sigur Landsbankin. Tey geva sum frá líður lægri rentu og minni váða. Landsbankin mælir til at taka langfreistað lán.