SAS-verkfall av: Mugu rokna við seinkingum

Ósemjan snúði seg um arbeiðstíð, vaktarskipaninar og lønina, og eitt uppskot til semju varð gjørt, sum bæði flogfelagið og flogskipararnir góðkendu.

Flogskipararnir fáa eina lønarhækkan, sum er millum 10 og 11 prosentstig í trý ár, og onnur viðurskifti, sum eitt nú arbeiðstíðir og vaktarskipanir verða betri, siga flogskipararnir.

Stjórin í SAS, Lars Sandahl Sørensen, sigur seg vera nøgdan við avtaluna, men hann er ikki nøgdur við at felagið í nærum eina viku hevur verið darvað í sínum virksemi við nógvum avlýsingum og at nógv ferðafólk ikki eru sloppin við flogførunum.

Mugu rokna við seinkingum

Lars Sandahl Sørensen sigur, at fólk mugu rokna við seinkingum, nú øll flogførini skulu aftur á veingirnar. Flogskipararnir fóru í verkfall fríggjadagin í farnu viku, eftir at samraðingarnar ímillum partarnar slitnaðu.

Síðani tá hevur SAS avlýst alla flúgving, og felagið roknar við, at yvir 300.000 ferðafólk merktu verkfallið, skrivar danska kringvarpið, DR.

Tað var norski semingsmaðurin, sum stóð á odda fyri semingsroyndini, sum byrjaði mikudagin, og endaði við semju í gjárkvøldið.