Á Summarfestivalinum fara tey at vera á varðhaldi mótvegis rúsevnum

Rúsevni, sum púra opið verða brúkt á festivaløkjum kring landið, er ein nýggjur trupulleiki hjá fyriskiparunum. Trupulleikin kom av álvara fram í ljósið, tá ein gestur á G!-festivalinum seinasta vikuskifti alment greiddi frá síni uppliving, tá nøkur ung fólk settust at snúsa rúsevni uttan at gera nakra roynd at fjala tað, tey gjørdu.

Kringvarpið hevur tosa við festivalfyriskiparar, sum allir eru á einum máli um, at rúsevni undir ongum umstøðum verða góðtikin á teirra festivalum.

Summarfestivalurin í Klaksvík, sum vanliga verður vitjaður av fólki í túsundatali, verður í døgunum 6. til 8. august, og Erik Biskobstø, fyriskipari, sigur, at tey fara at halda eitt vakið eyga við møguligum rúsevnum, og at greiða reglan er null-toleransa.

Hoyr innslag í útvarpstíðindunum: