Nógv skip og nógvur svartkjaftur vestanfyri

Nógv skip fiska svartkjaft vestan fyri Føroyar í løtuni.

Svartkjafturin er á veg norðureftir, vestan fyri Føroyar. 

Nú er hann í rennuni millum Føroya banka og Munkagrunnin, 30 til 40 fjórðingar vestan fyri Suðuroynna.

26 skip eru á leiðini í dag, 11 russisk, níggju íslendsk og seks føroysk.

Fiskiskapurin er góður.

Svartkjaftafiskiskapurin í føroyskum sjógvi plagar at vara til fyrstu vikuna í juni.

Kunnu landa uttanlands

Føroysk skip kunnu landa svartkjaft í øðrum londum sambært kunngerð hjá Fiskimálaráðnum. Kunngerðin er galdandi til 14.juni.

Trý hava higartil landað í Danmark, tvey í Noregi og tvey í Íslandi.

Skipini landa uttalands fyri at sleppa undan bíðirøðini við Havsbrún í Fuglafirði.

Sama kunngerð var eisini galdandi í fjør.

Tá landaðu átta føroysk skip svartkjaft uttanlands. 

Tey landaðu 16 ferðir, tilsamans góð 39.000 tons, upplýsir Vørn. 

Skipini landaðu í Írlandi, Noregi, Íslandi, Danmark og í Niðurlondum.