Starvsfólkini sleppa nú við til at seta stjórar

Heilsumálaráðið upplýsir, at semja er gjørd um, at setanarnevndin verður víðkað við umboðum frá starvsfólkunum í høvuðssamstarvsnevndini fyri Sjúkrahúsverkið. 

Aðalstjórin sigur seg harmast um, at starvsfólkaumboð í høvuðssamstarvsnevndini ikki hava verið við í setanartilgongdini frá byrjan og vísir á, at í framtíðini fer starvsfólkaumboð frá høvuðssamstarvsnevndini at vera við í setanum í Sjúkrahúsverkinum, sum Heilsu- og innlendismálaráðið varðar av.

11 fakfeløg

Nú forstjóri og stjórar skulu setast, fáa nýggju limirnir í setanarnevndini møguleika at viðgera umsóknirnar og gjøgnumganga øll mál og avrit frá setanartilgongdini og vera partur í tilmælinum til landsstýriskvinnuna um tær tríggjar setanirnar, sigur Heilsumálaráðið.

7. juni sendu 11 fakfeløg Heilsu- og Innlendismálaráðnum mótmæli. Tey mótmæltu, hvussu setanarbólkurin er settur saman. Fakfeløgini søgdu, at tað er brot á starvsfólkapolitikk landsins, at einki starvsfólkaumboð varð valt í setanarbólkin.