LÍV fegnast um hálvársúrslit

Kundarnir hjá tryggingarfelagnum LÍV rindaðu 161,4 milliónir krónur inn í felagið til eftirlønir og tryggingar fyrra hálvár í ár - og tað er sambært felagnum met.

Vøksturin er 12,6 prosent, upplýsir LÍV í tíðindaskrivi um hálvársroknskapin hjá samtakinum.

Sama tíðarskeið, tað vil siga fyrstu seks mánaðirnar í ár, rindaði LÍV-samtakið góðar 112 milliónir krónur út til eftirlønir og tryggingar.

Meðan 2018 var eitt vánaligt ár á fíggjarmarknaðinum, hevur gongdin verið jalig fyrra hálvár í ár, har allir íløgubólkar hava givið íkast til avkastið. Serliga eru tað partabrøvini, sum eru hækkaði
nógv í 2019.

Fyrstu seks mánaðirnar í ár var íløgu-avkastið hjá samtakinum tilsamans 213 milliónir krónur, upplýsir felagið í tíðindaskrivi um hálvársroknskapin.