Bíðirøð á Skála

Í fjúrtan dagar hevur ísfiskatrolin Polarhav staðið rimmarfastur á vogninum á bedingini hjá Mest á Skála, tí vognurin er farin av skinnarunum. 

Tað hevur millum annað við sær, at árliga eftirlitið av Rituni verður útsett í eina viku.

Vognurin fór av skinnarunum
Fyrr hava verið trupulleikar við bedingini á Skála, sum var umvæld fyri eini tíggju árum síðan. 

Og hesaferð rakti tað Polarhav, sum skuldi takast upp fyri tveimum vikum síðan. 

Brádliga fór vognurin av skinnarunum, so skipið hvørki fekst oman ella niðan. 

Polarhav skal lyftast av vogninum
Mouritz Mohr, stjóri í Mest, sigur, at teir hava gjørt fleiri royndir at fáa vognin á skinnararnar aftur, og at teir í hesi vikuni fara undir at lyfta Polarhav av vogninum.

Fleiri skip bíða at sleppa framat á Skála. Tey skulu bæði takast upp og flotast í hesi vikuni.