Løgtingskvinna vil hava føroyskt mál í rættinum

Málið í rættinum eigur at vera føroyskt burturav. Tað skrivar løgtingskvinnan Sirið Stenberg í sínum minnilutaáliti til uppskotið um nýggja rættargangslóg

– Fólk, sum skulu fyri rættarskipanina, eru í sera veikari støðu. At skula tosa eitt annað mál í slíkari støðu kann gera støðuna enn verri, skrivar Sirið Stenberg.

Løgtingskvinnan vísir eisini á, at føroyskt kom inn í bæði skúlan og kirkjuna, áðrenn málsøkini vórðu yvirtikin.

Tí heldur grundgevingin ikki at siga, at danskt skal vera í rættinum, bara tí málsøkið ikki er á føroyskum hondum, sigur hon. Uppskotið um rættargangslóg hevur aðru viðgerð í løgtinginum í dag.