Irakiski herurin: Tvær rakettir rakt Bagdad

Tvær rakettir raktu í gjárkvøldið sonevnda grøna økið í Bagdad í Irak, upplýsir irakiski herurin. Grøna økið í Bagdad er væl vart, tí har liggja sendistovur hjá ymsum londum, millum annað tann amerikanska.

Sambært irakiska herinum, fekk eingin mein av rakettunum. Løgreglan upplýsir, at onnur rakettin rakti bara 100 metrar frá amerikansku sendistovuni.

Rakettirnar raktu Bagdad, minni enn eitt samdøgur eftir, at iranskar rakettir vórðu skotnar ímóti tveimum herstøðum í Irak, sum útlendskir hermenn halda til í.

100 danskir hermenn fluttir til Kuwait

Onnur herstøðin, sum varð álopin, var stutt norðan fyri Bagdad og hin í Norðurirak. Eingin varð særdur í teimum álopunum heldur.

Eftir hendingina boðaði danski forsætisráðharrin, Mette Frederiksen, frá, at 100 av donsku hermonnunum í Irak, verða fluttir til Kuwait, meðan 30 til 40 verða verandi í Irak.

Teirra uppgáva er at venja irakiskar hermenn, men nú støðan er ótrygg, er tann venjingin steðgað, skrivar Ritzau. Onnur lond hava eisini boðað frá, at teirra herfólk verða flutt úr Irak, tað hava millum annað Spania og Týskland boðað frá.