Sluppu við hvøkkinum í 2018

Netið í Føroyum kundi verið lagt lamið í september 2018.

Tá varð heimasíðan nic.fo hakkað.

Nic.fo umsitur økisnavnið .fo.

Men av tí at FO-ráðið hevði flutt dátur haðani, sluppu føroyingar við hvøkkinum.

Vóru fluttar

Vóru dáturnar ikki fluttar í tryggari karmar í uttanhýsis ambætara, høvdu teldusníkarnir tá í september 2018n fingið fult vald á øllum føroyskum økisnøvnum á netinum. 

Varð skipanin tá sløkt, kundi .fo netøkið ikki brúkast, og hevði netið í Føroyum tá verið lagt lamið.

Hetta stendur í viðmerkingunum um uppskotið um økisnøvn á netinum, sum er gjørt í Umhvørvis- og Vinnumálaráðnum og sent til hoyringar. 

Ráðið sigur, at hendingin í september 2018 vísti, at neyðugt er at løgskipa økið, skipa umsitingina við lóg og at seta trygdina í fokus.