- Tíðindi, mentan og ítróttur
Albania og Norðurmakedónia vilja upp í ES
Albania og Norðurmakedónia eru til reiðar at samráðast limaskap í ES. Tað ger ES-nevndin nú greitt.
Stór framstig eru gjørd í báðum londum um eina óhefta rættarskipan, og í bardaganum móti skipaðum kriminaliteti og korruptión, skrivar danska kringvarpið.
Tí eiga ES-londini skjótast gjørligt at taka upp samráðingar við tey bæði londini, sum bæði vilja sleppa upp í ES, sigur ES-nevndin.
Treytirnar fyri at sleppa upp í ES eru millum annað, at landið er demokratiskt og virðir mannarættindi og rættarsamfelagið.
Og sambært kommisserinum, Olivér Várhelyi, hava bæði Albania og Norðurmakedonia ítøkilig úrslit at vísa á hesum viðvíkjandi.
Rættarnýskipan í Albania
Albanska stjórnin er í gongd við at gjøgnumføra eina stóra rættarnýskipan, meðan Norðurmakedónia hevur tikið stig til at tryggja óheftnið í rættarskipanini.
- ES-nevndin heldur fast við sítt tilmæli um, at samráðingar skulu takast upp við bæði Albania og Norðurmakedónia, og eg vóni, at limalondini fara at siga ja næstu vikurnar, sigur kommisserurin.
Men tað eru ikki øll londini í ES, sum hava hug at samráðast við tey bæði londini á Balkan í løtuni.
Frakland og Danmark steðgaðu samráðingunum í fjør, tí tey halda, at upptøkumannagongdin skal dagførast, áðrenn samráðingar kunnu byrja.
Danski uttanríkisráðharrin, Jeppe Kofod, hevur eisini sagt, at bæði londini hava stórar trupulleikar at dragast við, og tí er ikki vist, at Danmark fer at stuðla samráðingunum, hóast meirilutin av ES-limalondunum vil tað.