Professari: COVID-19 í hæddini seinast í apríl

COVID-19-farsóttin kemur i hæddina seinast í apríl, og tá kunnu umleið 300.000 fólk hava fingið sjúkuna.

Tað sigur Jens Lundgren, professari í infeksjónsmedisini á ríkissjúkrahúsinum í Keypmannahavn, við danska kringvarpið.

– Miðskeiðis í apríl, ella seinast í mánaðinum, fer smittan at breiða seg mest. Tá verða flest smittað um somu tíð, og flest fara eisini at hava tørv á at verða løgd inn á sjúkrahús, sigur hann.

Minkar umleið 1. mai

Else Smith, fyrverandi stjóri í danska heilsustýrinum, væntar eisini, at talið á smittaðum fer at minka umleið 1. mai.

– 14 dagar eru farnir av farsóttartilgongdini, og um einar seks vikur er tilgongdin komin í hæddina. Tá hava millum 200.000 og 300.000 fólk havt coronavirus, Nógv tey flestu fara ikki at hava tørv á læknahjálp yvirhøvur, sigur Else Smith við danska kringvarpið. 

Í løtuni eru 864 skrásettir tilburðir av corona í Danmark, og trý fólk eru deyð av sjúkuni.