Nýggj kommunuætlan fyri Havnina

Býráðið í Havn fer hóskvøldið at viðgera eitt uppskot um, at nýggja kommunuætlanin skal sendast til hoyringar. 

Fíggjarnevndin hjá býráðnum viðgjørdi ætlanina 20. mai og sendi hana til býráðið við uppskoti um, at kommunuætlanin verður løgd út til almenna hoyring.

Allar nevndir hjá býráðnum hava viðgjørt ætlanina. 

12 ára ætlan

Kommunuætlanin er ein heildarætlan um Tórshavnar kommunu, og hon umfatar 12 ár. Verandi kommunuætlan er frá 2014.

Nýggja kommunuætlanin er munandi meira víðfevnd enn tann, sum er nú, og hon viðger nógv fleiri øki. 

Ætlanin samantvinnar lógir um eitt nú býarskipan, vegir, náttúru- og umhvørvisvernd og almennar tænastur við politikkin hjá kommununi um bústaðir, umhvørvi og orku, parkering, frítíð og ítrótt, eldrapolitikk, barnapolitikk og ungdómspolitikk. 

Ætlanin lýsir eisini tørvin á bústøðum, vegum, dagsstovnum og skúlum og ellis- og røktarheimum.