Einki svar frá peningastovnunum um gjaldsskipanir

Umhvørvis- og Vinnumálaráðið hevur spurt felagið hjá føroysku peningastovnunum, hvussu nógvar pengar, peningastovnarnir lata fara av landinum, tí teir síðani 2010 hava havt netbanka og aðrar gjaldsskipanir í Danmark. 

Svarið er ikki komið enn, sigur Helgi Abrahamsen, landsstýrismaður, sum hevur svarað einum skrivligum fyrispurningi frá Høgna Hoydal, tingmanni.

Ein arbeiðsbólkur hjá Uttanríkis- og Vinnumálaráðnum gjørdi í 2016 eina forkanning um møguleikar fyri at taka peningastovnsskipanirnar heim aftur til Føroya. 

Einki umboð fyri peningastovnarnar var við í arbeiðsbólkinum. Og peningastovnarnir tóku heldur ikki undir við kostnaðarmetingunum ella niðurstøðunum hjá arbeiðsbólkinum.

Helgi Abrahamsen sigur eisini, at í 2010 arbeiddu 93 fólk hjá Elektron, sum tá hevði skipanirnar hjá peningastovnunum.

Nú arbeiða 69 fólk har.

Men peningastovnarnir vísa á, at flytingin til Danmarkar hevur gjørt, at fleiri kt-fólk arbeiða hjá peningastovnunum.