Grønlendingar skulu manna heimaverju

Arktisk Kommando arbeiðir í løtuni við at seta eina heimaverju á stovn í Grønlandi, sum skal vera mannað við sjálvbodnum grønlendingum.

Tað skrivar grønlendski miðilin, Sermitsiaq, um vikuskiftið.

John Boye Rasmussen, varaleiðari í Arktisk Kommando, sigur sambært Sermitsiaq, at tørvur er á einari eykamanning, sum kann stuðla Arktisk Kommando í kreppustøðum. Tí verður málið fyrireikað nú, og ætlanin er at útvega fólk til heimaverjuna um eitt ár.

Tørvur á 120 fólkum

Hann leggur aftrat, at tað ikki er avgjørt enn, hvussu nógvum sjálvbodnum brúk er fyri, men tørvur verður á umleið 120 fólkum, um tað skal gera nakran mun.

Frammanundan er ein deild til at taka, sum er mannað við bæði grønlendingum og dønum, um kreppustøður taka seg upp.

Hetta eru í høvuðsheitum fólk, sum fyrr hava gjørt hertænastu.

Men John Boye Rasmussen sigur, at tað hevði gjørt góðan mun, um Arktisk Kommando fekk hjálp frá staðkendum fólki, sum eisini duga grønlendskt.