Vil hava danir at byggja nýtt fongsul í Føroyum

Skulu umstøðurnar í Føroyum verða á sama stigi sum í danska fongsulsverkinum, er neyðugt við einum nýggjum fongsli í Føroyum.

Tað var boðskapurin hjá løgmanni, sum hevur havt fund danska løgmálaráðharran, Nick Hækkerup.

Umstøðurnar í Arrestini í Mjørkadali eru ikki nøktandi. Mjørkadalur er hvørki bygdur til arrest ella fongsul, og hóast ábøtur eru gjørdar, seta karmarnir óneyðugar avmarkingar fyri tey, sum sita dómin har, sigur løgmaður í tíðindaskrivi.

Varðhald og fongsul hvør sær

Á fundinum við løgmálaráðharran vísti Bárður á Steig Nielsen eisini á, at tað er avgerandi neyðugt at skipa umstøðurnar soleiðis, at varðhald er fyri seg og fongsul fyri seg. Eisini er neyðugt at taka stig til, at tey, ið fáa dóm longur enn eitt ár, kunnu sita revsingina í Føroyum, og at varðhaldsfangar og aðrir fangar kunnu vera hvør sær.

Bárður á Steig Nielsen sigur, at danski løgmálaráðharrin ásannaði, at tørvur er á at kanna nærri, hvussu bøtast skal um fongsulsumstøðurnar í Føroyum.

Løgmaður og danski løgmálaráðharrin avráddu eisini, at føroysk og donsk embætisfólk skulu umrøða og lýsa málið nærri, soleiðis at politisk semja kann fáast um, hvussu málið skal loysast.