Spania í undantaksstøðu

Undantaksstøða er lýst í Spania, og stjórnin hevur lýst útgongubann frá klokkan 11 á kvøldi, til klokkan seks á morgni. Tiltøkini komu í gildi í gjárkvøldið.

Lokalir myndugleikar kunnu eisini lýsa bann at ferðast millum økir í landinum.

Pedro Sanchez, forsætisráðharri,  sigur, at nýggju reglurnir eru galdandi í 15 dagar, men ætlanin er at leingja tær, so undantaksstøðan verður galdandi í seks mánaðir.

Harafturat verða størri samkomur av fólki bannaðar. Í mesta lagi seks fólk kunnu verða saman í senn sambært nýggju reglunum.

Spania er sera meint rakt av hesi bylgjuni av korona. 

Fleiri enn ein milliónir tilburðir eru staðfestir í Spania, síðani korona smittan fór at ganga, og fleiri enn 35.000 fólk eru deyð.