- Tíðindi, mentan og ítróttur
Kvinna hevði son innibyrgdan í 30 ár
![](https://kvf.fo/sites/default/files/styles/grein-ovasta-mynd/public/svenska_logregla.png?itok=7BRRaRB1)
Sonurin hevur verið innibyrgdur síðani hann var 12 ár, og er nú meira enn 40 ára gamal.
Tað var ein í familjuni hjá kvinnuni, sum gjørdist varug við drongin, tá hon sunnudagin skal hava verið í íbúðini. Hann hevði ilt við at tosa, var veikur, tannleysur og hevði stór sár á kroppinum.
Løgreglan vil ikki siga nógv um málið, men talskvinnan váttar, at málið verður kannað.
Sjúkrahúsið meldaði
Aftonbladet og Expressen skriva, at maðurin er fluttur á sjúkrahús, og sjúkrahúsið hevur meldað málið til løgregluna. Sambært Expressen skrivar, at drongurin gekk í skúla til sjeynda flokka, og eftir tað hvarv hann úr samfelagnum.
Kvinnan, sum fann mannin, sigur, at hon í nógv ár hevur havt illgruna um, at mamman innibyrgdi drongin. Tá kvinnan frætti, at mamma drongin var á sjúkrahúsi, fór hon inn í íbúðina.
- Øll íbúðin var køstaskitin, sigur kvinnan. - Har hevur eingin vaskað í fleiri áratíggju. Hetta var sum ein ræðufilmur, sigur hon.
Var illa fyri
Maðurin sat í einum króki, og hann gjørdist nærum hjartkiptur, tá hon tendraði ljósið í íbúðini, sigur hon. Heilsustøðan hjá honum er ring, sigur sjúkrahúsið, og ikki hevur borið til at avhoyra mannin.
Aftonbladet skrivar, at familjan lýsir mammuna at hava vart sonin nógv og tað endaði við, at hon tók hann úr skúlanum og hevði hann heima. Undantikið mammuna, so hevur maðurin ikki havt samband við onnur fólk síðani hann var barn, sigur kvinnan.