Argentina: Gjalda eykaskatt fyri koronutiltøk

Argentinska senatið hevur samtykt, at umleið 12.000 av ríkastu fólkunum í landinum skulu hjálpa til at rinda rokningina fyri koronutiltøk við eykaskatti. 

Tað skrivar AFP-tíðindastovan.

Pengarnir frá skattinum skulu m.a. brúkast til medisinska útgerð og kreppupakkar til fátæk fólk og smá feløg.

Forsetin í landinum, Alberto Fernandez, vónar, at eykaskatturin fer at geva 23 milliónir krónur í inntøku.

Fólk, sum eiga virði fyri meira enn 200 milliónir pesos - tað svarar til góðar 14 milliónir krónur - verða skattað við millum 3,5 og 5,25 prosentum av tí, sum tey eiga í Argentina og uttanlands.

Búskaparkreppa

Búskaparkreppa hevur verið í Argentina, og í august gjørdi landið avtalu við nakrar kreditorar um at umleggja skuldina.

Koronukreppan hevur gjørt fíggjarligu støðuna uppaftur truplari fyri landið, sum er meint rakt av koronusfarsóttini.

Men nú minka smittutølini. 

Í Argentina eru tilsamans  ein millión og 450.000 tilburðir staðfestir higartil, og nærum 40.000 fólk eru deyð av koronu.