Gevur grønlendsku børnunum umbering

Danska stjórnin sveik tey 22 grønlendsku børnini, sum vórðu tvingsilsflutt til Danmarkar í 1951. 

Tað staðfestir danski forsætisráðharrin, Mette Frederiksen, sum vegna donsku stjórnina umber viðferðina, sum teir 22 grønlendingarnir fingu.

- Eg havi fylgt málinum í fleiri ár, og verði áhaldandi rørd um teir menniskjaligu sorgarleikirnar, ið vóru partur av hesum málinum. Atlitið at børnunum varð sett til viks. Tí mistu tey tilknýtið til sínar familjur og ætt, lívssøgu, til Grønland, og harvið sítt egna fólk. 

- Tað er hent, og einki kann gerast fyri at broyta tað. Men vit kunnu taka ábyrgd og geva teimum eina umbering, sum vit áttu at havt tikið okkum av, men sviku, sigur Mette Frederiksen í einum tíðindaskrivi frá Forsætismálaráðnum. 

Tvingsilsflytingin kannað

Umberingin kemur í sambandi við eina felags kanning hjá donsku stjórnini og grønlendska Sjálvstýrinum av royndini, tá 22 grønlendsk børn vórðu tikin frá sínum familjum og tvingsilsflutt til Danmarkar. 

Børnini vóru flutt, tí mett varð, at tey fingu eitt betri lív í Danmark.

Kanningin greinar millum annað, hvat endamálið var við royndini, hvør bleiv útvaldur, upplivingarnar hjá børnunum, og hvat bleiv av teimum.

Kim Kielsen, grønlendski landsstýrisformaðurin, vísir á niðurstøðuna av kanningini, sum sigur, at avgerðin at flyta børnini hevði ein stóran menniskjaligan kostnað.

- Tað er rørandi at lesa um lagnuna hjá teimum 22 børnunum. Teirra serligi uppvøkstur fekk stórar avleiðingar fyri sambandið til familjuna og samfelagið, og ikki minst fyri teirra grønlendska samleika. 

- Nú, skjótt 70 ár seinni, er sambandið millum Danmark og Grønland nógv ment, og vit hava fingið Sjálvstýri. Í dag eru vit javnbjóðis partar, sum í felag kaga aftur í fortíðina, og merkja og síggja fylgjurnar av tátíðarinnar politisku avgerðum. 

- Vit hava og fara altíð at læra av okkara felags søgu. Bæði tær góðu og keðiligu síðurnar av søguni, skrivar Kim Kielsen.