Samlaði kostnaðurin 127 milliónir

Skúlin við Streymin kostar 127 milliónir krónur. Á eyka býráðsfundi mánadagin samtykti býráðið í Sunda kommunu eina eykajáttan til skúlan við Streymin.

Hon er átta milliónir krónur. Við í teimum 127 milliónunum eru 12,5 milliónir krónur til Eiðis kommunu, sum seldi Sunda kommunu sín part í felagsskúlanum á Oyrarbakka.

Skylda 60 milliónir fyri skúlan

Men framhaldsdeildarnæmingar á Eiði fara kortini at brúka skúlan við Streymin. Eiðis kommuna rindar fyri teir. 

Sunda kommuna skyldar nú 60 milliónir krónur fyri skúlan. Tær verða goldnar yvir seks ár. Hitt er longu goldið yvir raksturin. 

Eyka býráðsfundurin mánadagin var tann seinasti hjá fráfarandi býráði, sum fekk avgreitt skúlan við Streymin, áðrenn tað fór frá.