Heilsutrygd skal góðkenna viðgerðarstovnar

Tilgongdin at góðkenna viðgerðarstovnarnar hevur verið drúgv. Móti sumri í 2019 kom ein nýggj lóg, sum skipar virksemið á stovnum, ið veita rúsviðgerð.

Tá í 2019 varð - við lóg - ásett, at frá 1.januar í fjør kann viðgerð fyri bundni av rúsdrekka ella rúsevnum bara vera á góðkendum viðgerðarstovni.

Men viðgerðarstovnarnir fingu tó skotbrá í eitt ár afturat at søkja um góðkenning. 

Umsóknirnar komu inn stutt fyri nýggjár, sigur Egil á Bø, stjóri á Heilsutrygd, sum nú skal góðkenna og hava eftirlit við viðgerðarstovnunum.

Fimm atlit

Lógin um viðgerðarstovnar skal tryggja, at tilboðið eftir einari heildarmeting hevur neyðugu dygdina. Fimm atlit skulu takast, tá mett verður um dygdina í tilboðnum:

1)   Málbólkur, háttalag og úrslit.
2)   Bygnaður og leiðsla.
3)   Fakligar førleikar.
4)   Fíggjarviðurskifti og virksemisviðurskifti.
5)   Hølisviðurskifti.

Eisini verður kravt, at starvsfólkabólkurin á einum viðgerðarstovni samanlagt skal hava viðkomandi útbúgvingar, dagførda vitan um og royndir við rúsdrekkaviðgerð og rúsevnaviðgerð.

Viðgerðarstarvsfólk skulu hava eina útbúgving sum rúsdrekkaviðgeri ella rúsevnaviðgeri, ið er góðkend í Íslandi, Noregi, Bretlandi ella einum ES-landi.

Eisini skal ein viðgerðarstovnur hava skrivligar reglur fyri viðgerðarháttunum, ið verða nýttir til teir einstøku málbólkarnar. Og ein serstøk viðgerðarætlan skal gerast fyri hvønn einstakan persón, ið verður innskrivaður á viðgerðarstovn.

Viðgerðarstovnarnir skulu hava avtalu við lækna um at veita heilsufakligar tænastur við innskriving, uppihald og rúsviðgerð.

Og so skal viðgerðarstovnurin hava avtalu við løggildan sálarfrøðing.

Faklig hjálp úr Danmark

Sambært Egili á Bø fer Heilsutrygd at leita sær fakliga hjálp úr Danmark, nú viðgerðarstovnarnir skulu góðkennast.

Hann dugir ikki at siga enn, nær umsóknirnar verða avgreiddar.

Lógin um viðgerðarstovnar ásetir eisini, at Landslæknin hevur eftirlit við heilsufakliga virkseminum á viðgerðarstovnum.