Vaktarfólk í týningarlegu tvingsilsflutt úr USA

Hann varð tvingsislfluttur úr USA seinasta vikuskifti, skrivar NBC-news.

Í februar í fjør avgjørdi immigratiónsdómarin í Memphis í USA, at Friedrich Karl Berger skal vísast úr USA, tí hann hjálpti nasistunum, tá hann arbeiddi sum vápnað vaktarfólk í Neuengamme-týningarleguni í Týsklandi. Tað skrivar amerikanska løgmálaráðið í tíðindaskrivi.

Sambært dómaranum, arbeiddi Berger í Meppen-partinum av týningarleguni, har russarar, jødar, pollendingar, týskarar og fraklendingar vóru hildnir til fanga. Dómarin sigur, at umstøðurnar hjá fangunum vóru ræðuligar, og teir vóru noyddir at arbeiða til teir doyðu av máttloysi, stendur í fráboðanini.

Ómenniskjaligar umstøður

Legan tók sær av fangum fram til mars 1945, og Friedrich Karl Berger hjálpti tá við at flyta fangarnar til eina aðra legu, staðfestir rætturin. Tað tók tvær vikur at flyta fangarnar, og tað var gjørt undir ómenniskjaligum umstøðum, og meira enn 70 fangar doyðu, sigur embætisfólk.

Bergur játtaði undir rættarfundinum í Memphis, at hann forðaði fangunum í at flýggja, at hann ikki bað um at verða fluttur úr starvinum og at hann framvegis fær pensjón úr Týsklandi fyri krígstænastu sína, siga amerikonsk embætisfólk.

Berger undrast

Monty Wilkinson, advokatur, sigur, at Berger verður tvingsilsfluttur, tí USA er ikki trygt tilhaldsstað hjá teimum, sum hava luttikið í nasistiskum brotsverkum. 

Berger hevur búð í USA síðani 1959.  Hann segði í samrøðu við The Washington Post í fjør, at hann var 19 ára gamal, tá hann var vaktarfólk, og var noyddur at arbeiða í leguni.  - 75 ár seinni er hetta láturligt. Eg trúgvi tí ikki. Eg skilji ikki, hvussu hetta kann bera til í ein landi sum hesum. Tit noyða meg út úr mínum heimi, segði hann við The Washington Post.

Sá einki dráp

Myndugleikarnir í Hessen-landspartinum tók ímóti Berger og hann var avhoyrdur beint sum hann kom til Týsklands, skrivar ABS News.

Berger hevur upplýst fyri amerikonsku myndugleikunum, at hann arbeiddi í nakrar fáar vikur stutt fyri at Seinni heimsbardagi endaði, og hann sá hvørki ágang ella dráp har.