Vísa aftur at AstraZeneca elvir til blóðtøpp

Tað sigur fyritøkan, AstraZeneca, nú fleiri lond eru givin at koppseta fólk, eftir fleiri dømi um hjáárin.

Ritzau skrivar, at leiðslan í AstraZeneca vísir aftur, at vandin fyri blóðtøppi er størri, um fólk verða koppsett við teirra koppsetingarevni.

– Okkara kanningar siga einki um, at vandin fyri blóðtøppi í lungunum, ella onnur hjáárin, standast av koppingarevninum hjá okkum, siga umboð fyri AstraZeneca við Ritzau.

– Í veruleikanum eru hjáárinini hjá teimum, sum eru koppsett, minni enn vanligt, skrivar AstraZeneca.

Nóg trygt

ES hevur boðað frá, at koppingarevnið hjá AstraZeneca er nóg trygt, og tí kunnu lond halda fram at nýta evnið.

Bæði Frakland og Kanada hava boðað frá, at tey meta koppingarevnið frá AstraZeneca at verða trygt.

Danmark er givið at koppseta við AstraZeneca fyribils, eftir fleiri tilburðir av blóðtøppi. Millum annað doyði ein 60 ára gomul kvinna eina viku eftir, at hon varð koppsett, skriva danskir miðlar.

Koppingarevnið frá AstraZeneca er ikki komið til Føroya.

30 tilburðir

Heilivágsstovnurin í ES, EMA, hevur upplýst, at 30 tilburðir av blóðtøppi eru staðfestir í ES, eftir at fimm milliónir fólk eru koppsett við koppingarevninum frá AstraZeneca.

Men dentur verður lagdur á, at tað er ikki meir enn vanligt, og tí ber ikki til at siga, um koppingarevnið er orsøk til tað.

Bretland heldur fram at koppseta fólk við koppingarevninum frá AstraZeneca, hóast Danmark, Noreg og Ísland hava gjørt av at steðga á.

11 milliónir skamtar av koppingarevninum frá AstraZeneca eru latnir Bretlandi.