56 prosent grøn orka í mars

Í tilsamans 2,24 samdøgur var elframleiðslan í Føroyum í mars omanfyri 80 prosent grøn. Tað skrivar SEV á heimasíðuni.

Eftirspuringurin eftir elorku var størri í mars í ár enn í fjør, tá virksemið í samfelagnum minkaði nakað orsakað av koronufarsóttini. 

Nógv vatnorka í mars

Elframleiðslan í mars í ár var 34,3 GWt samanborið við 33,4 GWt í fjør. Serliga vatnorkuframleiðslan royndist væl í mars. 

Slakir 14 GWt, sum svarar til 39,6 prosent av samlaðu framleiðsluni, stavaðu úr vatnorku.  Framleiðslan úr olju kom upp á 44 prosent, og vindur og biogass stóðu fyri ávikavist 15 og 1,7 prosentum.

Biogassframleiðslan kom upp á 584 MWt, sum svarar til miðal mánaðarnýtsluna hjá umleið leið 1872 húskjum, skrivar SEV.