Meiriluti fyri loysing á valinum í Skotlandi

Skotski tjóðskaparflokkurin, SNP, og Grøni flokkurin, hava fingið meiriluta í skotska tinginum.

Tað vísir úrslitið av valinum, sum var hósdagin. 

SNP hevur fingið 64 sessir og Grøni flokkurin átta. Báðir flokkar hava í síni stevnuskrá, at Skotland skal loysa frá Bretlandi.

Tilsamans eru 129 sessir í tinginum í Edinburgh.

Nicola Sturgeon, fyrstiráðharri og forkvinna í SNP, sigur, at valúrslitið vísir, at fólkið vil hava eina fólkaatkvøðu aftrat um loysing.

SNP vil hava fólkaatkvøðu í seinasta lagi í 2023, og væntandi fara tjóðskaparflokkurin og tey grønu at leggja trýst á bretska forsætisráðharran, Boris Johnson, um fólkaatkvøðu.

Boris ímóti

Men tað verður ikki sum at siga tað, tí Boris Johnson er ímóti fólkaatkvøðu í Skotlandi, og hann hevur avgerandi orðið.

Seinast, fólkaatkvøða var í Skotlandi, var í 2014. Tá atkvøddu 55 prosent fyri, at Skotland skuldi verða verandi partur av Bretlandi.

Myndugleikarnir í London siga, at atkvøðan í 2014 var ein møguleiki, sum tú bara fært eina ferð í hvørjum ættarliði.

Men Nicola Sturgeon og skotski tjóðskaparflokkurin vísa á, at støðan er nógv broytt, síðani Bretland fór úr ES í 2016.

Meirilutin av skotum er fyri, at Skotland fer upp í ES sum eitt sjálvstøðugt land. Meirilutin av skotum var eisini ímóti, at Bretland skuldi fara úr ES.