Landsstýrismaðurin: Busssambandið til Miðnám í Vestmanna riggar

Ferðaætlanin hjá Bygdaleiðum millum Vágar og Miðnám í Vestmanna er løgd í neyvum samstarvi millum Strandferðsluna og leiðsluna á skúlanum.

Og sambært teimum hóskar ferðaætlanin væl til skúlagongdina hjá næmingunum, sigur Jørgen Niclasen, landsstýrismaður, í svari til Jóhannis Joensen, løgtingsmann. 

Avbjóðingar vóru við busssambandinum millum Sundalagið og Vestmanna.

Men fyri at gera tað lættari hjá næmingum í Sundalagnum (Eysturoy og Norðoyggjum) at ferðast til Miðnám í Vestmanna, var leið 460 sett í verk fyrr í ár, har bussur koyrir frá Oyrarbakka til Kollafjarðar.

Savnast í Kollafjarðardali

Næmingar úr Sundalagnum, Havn og Vágum savnast í Kollafjarðardali, og fara saman við bussinum til Vestmanna.

Jørgen Niclasen sigur, at skal beinleiðis bussruta skipast millum Vágar og Vestmanna, fara tveir bussar samstundis til Vestmanna.

Bussruta er millum Glasir og Vágar, og arbeitt verður við busssambandi millum Gásadal, Bø og Sørvág, so m.a. miðnámsskúlanæmingar úr hesum bygdum hava busssamband millum heimbygd og miðnámsskúla, sigur Jørgen Niclasen í svarinum til Jóhannis Joensen.