Eldur í trimum húsum á Stykkinum í gjárkvøldið

Tað eru vitni, ið hava greitt løgregluni frá, at eldarnir vórðu ásettir, og vitni hava eisini sagt, júst hvørji fólk talan skal vera um. Politiið veit ikki at siga, um eldurin er ásettur í øllum trimum húsum, ella um eldurin hevur breitt seg víðari frá einum húsi. 

Nøkur fólk eru handtikin í málinum, men hesi eru enn ikki avhoyrd. Løgreglan roynir fyrst at fáa greiðu á júst hvat er hent, sambært vitnum.

Kringvarpið hevur tosað við grannar á Stykkinum, sum vilja vera ónevndir. Teir siga, at eldurin kyknaði um tíggju-ellivu tíðina í gjárkvøldið. Síðan kom sløkkiliðið á staðið, og eldurin varð sløktur. 

Sambært grannunum er talan um tvey vanlig sethús og eitt summarhús, og tað eru tríggir ymsir eigarar. 

Tað var nógvur vindur í gjár, og tey vit hava tosað við hildu, at hetta møguliga kann hava ávirkað, hvussu eldurin breiddi seg.

Løgreglan kannar eisini eitt harðskapsmál. Eitt fólk ringdi inn á politistøðina um hálvgum sekstíðina í morgun, og greiddi frá, at hann varð blivin skallaður niðri í býnum í Havn. Løgreglan hevur enn ikki fingið fatur á fólkinum, sum skal hava framt harðskapin, men politiið hevur fingið fleiri ábendingar um, hvønn talan kann vera um.

Síðan er eisini eitt mál um brúksstuldur. Tað málið snýr seg um, at ein hýruvognur skal hava verið tikin niðri í Steinatúni í nátt.

Løgreglan veit ikki at siga, um samanhangur er ímillum øll hesi málini, men hetta verður gjølla kannað.