Herverk og harðskapur

Herverk var framt á ein bil í Havn í nátt. Tað upplýsir løgreglan í morgun. Brotsmaðurin hevði oyðilagt ymiskar lutir inni í bilinum, men brotsmaðurin hevði tó mist eitt samleikaprógv inni í bilinum. 

Hetta lættir munandi um hjá løgregluni at kanna málið, sigur vakthavandi á løgreglustøðini í morgun. Málið verður kannað nærri í dag.

Eisini vóru fýra ferðsluóhapp í nátt orsakað av hálkuni. Tey vóru í Klaksvík, í Leirvík, á Gomlurætt og í Vági. Ein sjúkrabilur varð sendur á staðið í sambandi við eina óhappið, tí at bilurin var farin á rull. Men tá ið komið var á staðið, varð staðfest at talan var bert um materiellan skaða.

Jólaborðhald og nógv fólk

Fitt av fólki var í býnum í nátt í sambandi við jólaborðhald, og løgreglan hevur av tí sama havt nokk at gera.

Um midnáttartíð varð ringt eftir løgregluni fyri at skilja sundur ein bardaga í Steinatúni. Her var talan um tannáringar, ið høvdu lagt á ein ungan drong. Drongurin var sendur á sjúkrahúsið til kanningar, og har var staðfest, at drongurin hevði fingið heilaskjálvta.

Nakrir av tannáringunum eru avhoyrdir bæði av barnavernd og av løgregluni, og verður hildið fram at avhoyra í dag. Væntandi verða teir ákærdir fyri harðskap, sigur vakthavandi.

Seinni út á náttina varð løgreglan boðsend fleiri ferðir fyri at skilja ávirkað fólk sundur. Og í trimum førum hevði hetta við sær, at viðkomandi fekk bót fyri brot á skilhaldsreglurnar.

Eisini varð løgreglan boðsend at heinta ein ávirkaðan mann, ið var farin til gongu gjøgnum Eysturoyartunnilin.