Uppsjóvarkvotur skulu umleggjast til eginkvotur beinanvegin

Jacob Vestergaard, landsstýrismaður í fiskivinnumálum, hevur lagt eitt broytingaruppskot til lógina um sjófeingi fyri tingið.

Uppskotið er, at tey umleið 38.000 tonsini av makreli, svartkjafti og norðhavssild, sum eru latin til vinnuligar royndir og verkætlanir, ískoyti til verandi kvotur og kvotur til skipakeyp, kunnu gerast til eginkvotur beinanvegin, um mett verður, at grundarlag er fyri framhaldandi og burðardyggum fiskiskapi, og um treytirnar annars hava verið hildnar. 

Sambært galdandi lóg kan tilsøgn um kvotur verða latin í upp til fimm ár. Í lógini um sjófeingi stendur at: 

Fiskiloyvi verður latið upp til eitt ár í senn, og kann bert verða endurnýggjað, um treytirnar í tilsøgnini eru hildnar. Er loyvi givið til veiðu eftir ávísum fiskaslagi sambært hesi grein í samanlagt fimm ár, kann landsstýrismaðurin eftir umsókn taka avgerð um at leggja kvoturnar um til egnar árskvotur, um mett verður, at grundarlag er fyri framhaldandi og burðardyggum fiskiskapi, og treytirnar í loyvinum annars hava verið loknar, og loyvishavarin lýkur vanligu treytirnar ásettar í §§ 11-13.

Leggja um beinanvegin

Við lógarbroytingini kann landsstýrismaðurin altso við fyrisitingarligari avgerð leggja kvoturnar til vinnuligar royndir um til eginkvotur beinanvegin. 

Í galdandi lóg er ikki heimild at flyta óbrúktar kvotur av makreli, norðhavssild og svartkjafti, sum eru settar av til vinnuligar royndir og verkætlanir í 2021, til 2022. 

Avlopsnøgdir av kvotum til vinnuligar royndir og verkætlanir í 2021 kunnu flytast til 2022.

Umframt hesa broyting vil landsstýrismaðurin eisini sleppa at lata kvotur frá 2020, sum ikki eru fiskaðar, at verða fiskaðar í 2022. 

Eisini verður brúksskyldan tikin burtur fyri makrel, svartkjaft og norðhavssild.

Veiðiloyvi og stál

Tann 1, januar verður veiðiloyvi aftur tengt at stálinum, og tað merkir eftir galdandi lóg, at tað er skipið, sum skal fiska kvotuna.

Tað verður fyri uppsjóvarfiskin broytt soleiðis, at loyvishavarin kann avhenda kvoturnar, uttan at missa tær.