Fuglakrím staðfest í Føroyum fyri fyrstu ferð

Fuglakrím er nú staðfest í Føroyum. 

Tað skrivar Heilsufrøðiliga Starvsstovan í tíðindaskrivi. 

Sýnir vóru send til Statens Serum Institutt (SSI) í hesi vikuni, og nú eru tey fyrstu svarini komin:

Tveir skúgvar eru staðfestir positivir fyri fuglakrím.

Sýnirnar skulu greinast nærri, fyri at staðfesta hvat slag av fuglakrími talan er um. Tað verður greitt fyrst í næstu viku.

Heilsufrøðiliga starvsstovan fylgir støðuni, og tá ið endaligu svarini eru tøk, kemur meira kunning

Ikki nerta sjúkan ella deyðan fugl

Heilsufrøðiliga starvsstovan heitir á fólkum um at siga sær frá, um tey koma fram á sjúkan ella deyðan fugl - serliga rovfugl.

Í fráboðanini skal, eftir førimuni, upplýsast fuglaslag og staðið, har fuglurin er sæddur. Eisini er sera gott at senda mynd inn og upplýsa knattstøðu, um hon er kend.

Upplýsingarnar verða nýttar til at fylgja við støðuni í Føroyum, og um neyðugt, at taka sýnir inn til nærri kanningar. Boðast kann frá á hfs@hfs.fo.

gæs

Gott reinføri til jólagásina

Tað er vanligt í Føroyum at eta dunnu ella gás á jólum, og ein partur av hesum fuglunum er heimafuglur, ið er aldur í Føroyum.

Tað slagið av fuglakrími, ið hevur herja í okkara grannalondum í seinastuni, hevur víst seg at hava lítil sannlíkindi at smitta til fólk.

Tó vil Heilsufrøðiliga starvsstovan minna fólk á at halda sera gott reinføri, tá ið fuglurin verður dripin, hagreiddur og tilgjørdur.

Maturin skal hitast væl; kjarnuhitin skal vera minst 75 ºC.

Mint verður á, at sjónliga sjúkur fuglur ongantíð skal nýtast til matna.

MEIRA FÆST AT VITA INNI Á HEIMASÍÐUNI HJÁ HEILSUFRØÐILIGU STARVSSTOVUNI.