Sammóðir er ársins orð

Góðan Morgun Føroyar skipaði aftur í ár fyri at velja ársins orð. 

Lurtarar sendu eina rúgvu av uppskotum inn, og Málráðið valdi so 10 orð út millum tey mongu innsendu uppskotini.

Níggju av hesum orðunum høvdu onkursvegna samband við koronu-farsóttina, og 10. orðið var orðið sammóðir, sum er eitt heitt politiskt epli í løtuni.

Síðani skuldi ein dómsnevnd við trimum fólkum velja millum hesi 10 orðini, sum vóru:

Álit
Koppset(ing/a)
Koronupass
Negativur
Positivur
Prik
Sammóðir
Smitta
Smittutøl
Tilmæli

Øll trý í dómsnevndini, sum vóru Ragnar Sigrunarson, málsligur ráðgevi og samskipari í Málráðnum, Jón Brian Hvidtfeldt, formaður í felagnum Føroysk Miðlafólk, og Óluva Klettskarð, forkvinna í felagnum Føroyamál valdu orðið "sammóðir", sum sostatt er Ársins orð 2021.