Fíggjarlógin samtykt

Samgongan stóð saman um fíggjarlógina fyri 2022, sum varð samtykt í gjárkvøldið. 

Orðaskiftið og atkvøðugreiðslan var liðug um níggjutíðina í gjárkvøldið.

Undan triðju viðgerð, sum var í gjár, legði andstøðan  31 broytingaruppskot fram. Tey vórðu øll feld.

Samgongan legði um 25 broytingar fram í einum uppskoti, og tær broytingarnar vóru allar samtyktar.

Fyribils er avlopið á fíggjarlógini fyri 2022 góðar 36 milliónir kr., men uppskot um at hækka avgjaldið á bensini og diesel og at hækka vegskattin, skulu geva landskassanum 24 milliónir kr., aftrat.

So talan verður um eitt avlop uppá 60 milliónir kr., tá avtornar, sigur formaðurin í Fíggjarnevndini, Erhard Joensen.