Seks fjølmiðlar hava fingið miðlastuðul

Seks fjølmiðlar hava fingið miðlastuðul fyri 2021. 

Sjey umsóknir vóru í ár, ein færri enn í fjør. 

Stuðulin er úr góðum 182.00 kr., sum VP.fo, fekk, upp í 606.479 krónur, sum Sosialurin fekk.

Hini, sum fingu, eru Portal.fo, Dimmalætting, Norðlýsið og FM1.

Tvær mió. kr. 

Játtanin til miðlastuðul er tvær milliónir krónur.

Stuðulin verður latin sum føst grundupphædd, sum er 40 prosent av teimum tveimum milliónunum, býtt javnt millum umsøkjararnar, sum lúka treytirnar.

Hini 60 prosentini eru latin sum ein lutfalslig upphædd í prosentum av skjalprógvaðum lønarútreiðslum árið fyri, í hesum førinum í 2020.

Miðlastuðulin kann í mesta lagi vera 40 prosent av skjalprógvaðu lønarútreiðslunum árið fyri.

Í fjør eru lønirnar hjá teimum seks miðlunum, sum hava fingið stuðul játtaðan, minkaðar úr 21,5 í 2019 til 20,1 mió. kr.