Ukraina: Nato og Russland eru langt frá hvørjum øðrum

NATO og Russland eru framvegis langt frá hvørjum øðrum í spurninginum um Ukraina.

Tað staðfesti NATO-aðalskrivarin, Jens Stoltenberg, eftir fýra tímar langa fundin millum partarnar í Genéve, har Russland legði síni krøv fram fyri Vesturheiminum.

- Tað verður ikki lætt at finna eina semju, men tað er positivt, at NATO og Russland settu seg við sama borð og kjakaðust um grundleggjandi evni, sigur Jens Stoltenberg sambært Reuters.

Tingingar eru millum Russland øðrumegin og NATO hinumegin, eftir at Russland hevur flutt nógva hermegi til ukrainska markið.

Russland avsannar, at ein innrás í Ukraina er á veg, men krevur millum annað, at NATO veitir vissu fyri, at Ukraina ikki verður limað inn í NATO-verjusamgonguna.