Bara seks varðhaldsfangar í Mjørkadali

Í løtuni hevur politiið seks varðhaldsfangar í Mjørkadali.

So fáir hava ikki verið síðani 2019.

Í Mjørkadali eru 14 pláss.

Seinastu tíggju árini eru 22 varðhaldsfangar fluttir úr Føroyum til Danmarkar at sita í varðhaldi. 

Í allarflestu førum var orsøkin, at atburðurin hjá fangunum setti trygdina í Mjørkadali undir trýst. 

Men í fýra førum máttu varðhaldsfangar flytast til Danmarkar, antin tí pláss var ikki fyri teimum í Mjørkadali, ella tí politiið bað um tað, upplýsti danska Løgmálaráðið í fjør summar.