WHO: Mugu fáa enda á koronufarsóttini

Heimsins lond mugu arbeiða saman fyri at fáa ein enda á koronafarsóttini, og vit hava øll amboðini til at gera tað.

Tað segði aðalskrivarin í heimsheilsustovninum WHO á tíðindafundi í Týsklandi í dag, skrivar Reuters.

- Covid-19-farsóttin fer nú undir sítt triðja ár, og vit eru komin á eitt avgerandi vegamót, segði Tedros Ghebreyesus, aðalskrivari í WHO.

Samstarva um koppseting

- Vit mugu arbeiða saman fyri at gera enda á álvarsama partinum av farsóttini, tí vit kunnu ikki lata hana draga óneyðugt út, legði hann aftrat.

Aðalskrivarin hevur í fleiri umførum heitt á heimsins lond um at samstarva meiri um koppseting fyri koronu.

Í gjár segði evropeiski leiðarin fyri WHO, Hans Kluge, at omikron-frábrigdið kann gerast endin á farsóttini í Evropa. Hann segði í sama viðfangi, at eini 60 prosent av fólkunum í Evropa kunnu vera smittað við koronu, áðrenn mars mánaður byrjar.