Ferðavinnan finst at uppskoti um meirvirðisgjald

Uppskotið tykist ófullfíggjað og ikki búgvið at vera sent til hoyringar. 

Tað er harði dómurin hjá Ferðavinnufelagnum um ætlaðu broytingarnar hjá Fíggjarmálaráðnum í lógini um meirvirðisgjald. 

Ferðavinnufelagið fýlist eisini á sera stuttu hoyringarfreistina, sum bara var seks dagar. 

Felagið tilskilar sær tí rætt til at koma við fleiri viðmerkingum eftir hoyringarfreistina, um felagið fær upplýsingar, sum kunnu broyta hoyringarsvarið hjá felagnum.

Yvirskipað vil Ferðavinnufelagið vísa á, at uppskotið bjóðar til stórar broytingar í meirvirðisgjaldinum hjá ferðavinnuni. 

Ótilætlaðar broytingar

Felagið væntar, at í flestu førum eru avleiðingarnar av broytingunum ótilætlaðar, tí nógv viðurskifti standa ólýst, og álvarsamar broytingar eru als ikki lýstar í viðmerkingunum. 

Verandi reglur um fólkaflutning eru torskildar, og nógv ivamál hava verið um tulkingina.

Tað er tí væl skilligt, at Fíggjarmálaráðið vil hava nágreiningar. 

Ferðavinnufelagið sigur tó, at ætlaða broytingin ger ikki støðuna minni fløkjaliga. 

Framvegis er ikki greitt, hvat ásetingin umfatar, sigur Ferðavinnufelagið.