Putin fúsur at samráðast við ukrainska forsetan

Ukrainski forsetin, Volodymyr Zelensky, hevur heitt á russiska forsetan, Vladimir Putin, um at hittast við samráðingarborðið. 

- Eg heiti enn einaferð á russiska forsetan. Samanbrestir eru um alt Ukraina. Latið okkum sessast við samráðingarborðið og steðga talinum á deyðum, segði Zelensky í sjónvarpi fyrr í dag.

Og sambært einum talsfólki í Kreml, er Putin nú til reiðar at senda eina sendinevnd til høvuðsstaðin í Hvítarusslandi at samráðast. 

Volodymyr Zelensky, Volodymyr Zelenskij - Mynd: Ritzau Scanpix

Volodymyr Zelensky, forseti í Ukraina, hevur biðið russiska starvsbróðurin um sessast við samráðingarborðið. (Mynd: Ritzau Scanpix)

Minsk hevur verið miðdepil í samráðingum millum Ukraina, Russland og sjálvtilnevndu lýðveldini, Luhansk og Donetsk, í Eysturukraina.

Russland hevur fyrr víst aftur at samráðast um russisk áhugamál.

Skulu leggja vápnini

Russland hevur sagt, at ávís krøv eru fyri, at samráðingar við Ukraina koma upp á tal, m.a skulu ukrainar leggja vápnini, og at landið skal gerast uttanveltað.

Fyrr í dag vardi russiski uttanríkisráðharrin, Sergej Lavrov, innrásina í Ukraina.

- Russland kann ikki vísa líkasælu, tá ið leiðararnir í lýðveldunum, Donetsk og Luhansk, hava biðið um hernaðarliga hjálp móti áloyparum, segði Lavrov við russisku tíðindastovuna RIA.

- Øll hesi árini hava okkara samstarvsfelagar í Vesturheiminum altíð vart russiska stýrið og hava vent blinda eygað til fólkadráp. Vesturheimurin skúgvar til viks veruleikan um fólkadrápini í Donbass, sigur Lavrov.