Umleið 5.000 fólk deyð í Mariupol

Nærum 5.000 fólk eru deyð í kringsetta havnabýnum Mariupol, orsakað av russiskum álopum.

Tað siga myndugleikar í býnum, sambært miðlinum Kyiv Independant. 

Sambært ST-mannarættindaskrivstovuni eru 1151 sivilfólk dripin, síðani kríggið byrjaði. ST leggur aftrat, at veruliga talið er helst munandi størri. 

Mariupol hevur verið kringsett av russiskum hernaðardeildum síðani 1. mars, og tað hevur gjørt tað trupult fyri ikki at siga ógjørligt at fáa humanitera hjálp inn í býin og fólk út úr býnum. 

Borgarstjórin í Kyiv, Vitalij Klytjko sigur nú sambært Reuters, at fleiri enn 100 sivilfólk eru dripin í høvuðsstaðnum, síðani Russland gjørdi innrás í Ukraina.