Russland minkar krígsvirksemið uttan fyri Kyiv

Russiska verjumálaráðið sigur nú, at landið fer at skerja munandi í krígsvirkseminum uttan fyri ukrainska høvuðsstaðin  Kyiv, og Tsjernihiv har norður í landinum. 

Tað skrivar russiska tíðindastovan, RIA.

Fráboðanin kemur samstundis, sum friðarsamtalurnar millum Ukraina og Russland í Istanbul endaðu í dag.

Hetta verður gjørt fyri at styrkja álitið millum partarnar og skapa røttu umstøður fyri samráðingum frameftir, og røkka málinum at skriva undir eina friðaravtalu við Ukraina, sigur russiski vara-verjumálaráðharrin, Alexander Fomin.

Tað er kortini enn ógreitt, hvat hetta í veruleikanum merkir, og nær russar minka um hernaðarliga virksemið.

Ukrainska sendinevndin segði  í dag, at hon kann taka undir við at Ukraina verður uttanveltað land,  men tað er treytað av, at partarnir semjast um frið.

USA: Eingi tekin enn

USA sigur í dag, at tey hava eingi tekin sæð enn, um at Russland tekur friðarsamráðingarnar í álvara. 

Tað sigur Antony Blinken, sambært Reuters.

Blinken sigur, at munur er á, hvat Russland sigur, og hvat Russland ger.

Hann endurtók, at Russland eigur at gevast álopunum alt fyri eitt og taka deildirnar aftur úr Ukraina.

Um USA og amerikanski stuðulin til Ukraina kann stuðla upp undir friðartingingarnar, so vilja amerikanskir myndugleikar vera til hjálpar, sigur Blinken.

Antony Blinken - Mynd: Ritzau Scanpix

Amerikanski uttanríkisráðharrin, Antony Blinken. (Mynd: Ritzau Scanpix)

Krígsfangar

Sambært russiskum miðlum, hevur Russland  heitt á Ukraina um at halda Genéve-sáttmálan um krígsfangar.

Russland krevur eisini, at Ukranina ikki setur upp útlendskar herstøðir í Ukraina, skrivar Business Online. 

Russland skal eisini hava fingið skrivliga umbøn um ikki at brúka kjarnorkuvápn, skrivar blaðið.