Eykajáttan til H-bygning og hækkandi oljuútreiðslur

Uni Rasmussen, landsstýrismaður, hevur lagt fram uppskot um eykajáttanarlóg, sum hevur góðar 61 milliónir krónur í halli.

Men eftir serinntøkur frá Búnaðarstovuni upp á hálvatriðju millión krónur, verður hallið umleið 59 milliónir kr.

Størsta umbønin er frá Heilsumálaráðnum um at gera H-bygningin á Landssjúkrahúsinum lidnan, ella tilsamans 51,4 milliónir kr.

Verklagslóg er í tinginum at innrætta kjallaran í H-bygninginum til parkering, goymslu og annað fyri 46,2 mió. kr.

Arbeiðið upp á H-bygningin verður væntandi liðugt í hesum árinum, og tí verður biðið um at leggja tær 10 milliónir krónurnar, sum játtanin í løgtinginum varð lækkað, aftrat nú.

Biðið verður eisini um átta milliónir kr. til koronuútreiðslur og 16,4 milliónir kr. til hækkandi oljuprísir, m.a. hjá Strandferðsluni. 

Uppskotið fær fyrstu viðgerð í tinginum týsdagin.