Liðugt viðgjørd á sjúkrahúsi bíða eftir plássi á ellisheimi ella sambýli

Higartil í ár hava 30 fólk verið í sjúkrahúsi eftir at tey eru liðugt viðgjørd har, tí ikki er pláss fyri teimum aðrastaðni, so sum í ellisheimi ella sambýli. Tey kunnu ikki útskrivast.

Tey hava verið tilsamans 583 dagar í sjúkrahúsi.

Talan er um níggju fólk í Suðuroyar sjúkrahúsi, eitt í Klaksvíkar sjúkrahúsi og 20 í Landssjúkrahúsinum.

Í fjør vóru 65 liðugt viðgjørd fólk í 2.243 dagar í sjúkrahúsi, tí ikki var pláss fyri teimum aðrastaðni.

Helvtin yngri enn 67 ár

Tað sigur Kaj Leo Holm Johannesen, landsstýrismaður, í svari til Bjarna Hammer, løgtingsmann, sum spurdi um sjúkrahús og plásstrot.   

Øll bíða tó ikki eftir ellisheimi ella sambýli, tí higartil í ár er okkurt um helvtin teirra, sum ikki kunnu útskrivast, yngri enn 67 ár.

Ein orsøk er, at Almannaverkið ikki hevur tilboðini, sum fólkini hava brúk fyri, ella vilja fólk ikki hava hjálpina, sum Almannaverkið bjóðar.