Ukrainskar deildir í Mariupol vilja ikki geva seg yvir

Ukrainski forsætisráðharrin, Denys Smyhal, sigur, at ukrainsku deildirnar í kringsetta havnarbýnum Mariupol hava ikki givið seg yvir.

Tað sigur hann í samrøðu við sjónvarpsstøðina, ABC.

Russland gav annars Ukraina kravboð um at leggja vápnini í seinasta lagi á middegi í dag, men tað hava ukrainsku deildirnar ikki gjørt, sigur forsætisráðharrin. 

Russiski herurin kann koma aftur

Volodymyr Zelenskyj, forseti, sigur, at Ukraina hevur ongar ætlanir um at lata eystara part av landinum frá sær í krígnum, sum byrjaði, tá Russland gjørdi innrás 24. februar.

Forsetin sigur við CNN, at ukrainski herurin er til reiðar at stríðast móti russiska herinum í Donbas-landspartinum har eysturi í landinum.

- Eg havi einki álit á russiska herinum og leiðsluni har. Veruleikin er, at vit stríddust ímóti teimum, og teir tóku seg aftur frá leiðunum kring Kyiv og Tjernihiv. Tað merkir kortini ikki, at russiski herurin kann nærkast hesum leiðum aftur, um hann ikki er førur fyri at taka Donbas, sigur Zelenskyj við CNN.