Berlingske: Føroyar snúgva sær uttan um ES-revsitiltøk

Stóra danska tíðindablaðið, Berlingske Tidende, hevur eina hvassorðaða yvirskrift í dag.

Har stendur, at Føroyar eru at meta sum sjórænarar, tí Føroyar snúgva sær uttan um revsitiltøkini hjá ES, og lata russisk skip gera, sum teimum lystir.

Blaðið ger nógv burturúr, at Føroyar, tá kríggið í Ukraina byrjaði í februar, lovaðu at seta somu tiltøk í verk sum ES. Men tá ES setti síni tiltøk í verk 16. apríl, bannaðu føroyingar ikki russiskum skipum at leggja at bryggju. Blaðið nevnir tó einki um, hvørji undantøk eru.

Framsøgumaðurin í Føroyamálum hjá Eindarlistanum, Christian Juhl, sigur, at Føroyar eiga at seta eitt bann i verk.

- Føroyar kunnu gera stóran mun, og skal bannið rigga, mugu øll lond vera við, sigur Christian Juhl. 

Sjórænarar

Stjórin í Danmarks Fiskeriforening, Ken Skau Fischer, heldur, at Føroyar gera, sum teimum lystir, og tað er hann, sum sammetir føroyingar við sjórænarar. 

Sjúrður Skaale, fólkatingslimir, eru eisini við í greinini, og hann hartar Føroyar fyri ikki at gevast við samhandlinum við Russland. 

Berlingske hevur roynt at fingið viðmerking frá landsstýrinum og danska uttanríkisráðnum, men tað hevur ikki eydnast. 

56 prosent fyri

Javnaðarflokkurin á Fólkatingi hevur kunngjørt eina nýggja spurnarkanning, ið Spyr.fo, hevur gjørt fyri flokkin.

Sambært kanningini, siga 56 prosent, at tað er í lagi steðga samhandlinum við Russland, og 53 prosent vilja steingja havnirnar. 

Óvissan í kanningini er 3,5 prosent.