Fíggjarnevndin: Skeiv ráðgeving dýrkar H-bygningin

Skeiv ráðgeving er orsøkin til, at kjallarin í H-bygninginum á Landssjúkrahúsinum er vorðin dýrari enn upprunaliga mett.

Tað sigur Landsverk, og tað sigur Fíggjarnevndin eisini, nú hon hevur skrivað álit um hækkaðu játtanina.

Fíggjarnevndin tekur undir við uppskotinum um at hækka játtanina.

Nevndin hevur fingið at vita, at ósemja er millum Landsverk og arbeiðstakarar um meirveitingar, sum eru 14 mió. kr.

Landsverk sigur seg hava mótkrøv, sum eru 13 mió. kr.

Í staðin fyri 46,2 mió. kr., sum arbeiðið skuldi kosta og, sum eru játtaðar, kostar tað nú 67 mió. kr.  

Neyðugt við tveimum goymslum

Ráðgevingin var, at bara ein goymsla var neyðug.

Men síðani er vorðið greitt, at brúk er fyri tveimum goymslum, einari reinari og einari sterilari. 

Hetta hevur eisini við sær, at lyftan skal vera tvíbýtt.

Átaluvert

Fíggjarnevndin heldur tað vera átaluvert, at tílíkir feilir yvirhøvur koma fyri so seint í fyrireikingunum.

Landsverk kannar, um grundarlag er fyri at leggja krav móti ráðgevaranum fyri at fáa endurgoldið tann meirkostnað, sum stendst av skeivu ráðgevingini.

Hetta heldur Fíggjarnevndin vera eina sjálvfylgju.