ES fyrireikar sætta pakkan við tiltøkum móti Russlandi

ES-nevndin er komin undir land við sætta pakkanum við tiltøkum ímóti Russlandi fyri innrásina í Ukraina.

Enn er talan um eitt uppskot, og øll limalondini skulu taka undir við uppskotinum, fyri at tað skal koma í gildi.

ES-nevndin mælir m.a. til, at allur innflutningur av ráolju úr Russlandi skal halda uppat í seinasta lagi um seks mánaðir, og innflutningurin av viðgjørdum oljuúrdrátti skal steðga við árslok.

Tað vóru boðini frá forkvinnuni í ES nevndini, Ursulu von der Leyen, tá hon kunnaði ES-tingið um ætlanirnar í morgun.

Haraftrat mælti hon til, at ES fer at virka fyri, at størsti russiski bankin, Sberbank, sum staturin eigur, verður koyrdur úr gjaldsskipanini, Swift.

Peningastovnurin umsitur umleið ein triðing av øllum bankavirkseminum í Russlandi.