Ríkisdagurin í Finnlandi samtykt Nato-limaskap

Finski ríkisdagurin atkvøddi seinnapartin við stórum meiriluta fyri at biðja um limaskap í Nato. 188 atkvøður vóru fyri og tríggjar ímóti. 

Fyrr í dag skrivaðu svenski forsætisráðharrin, Magdalena Andersson, og uttanríkisráðharrin, Ann Linde, undir svensku umsókina um Nato-limaskap.

Hósdagin fara finski forsetin, Sauli Niinistø, og svenski forsætisráðharrin, Magdalena Andersson, til Washington, har tey skulu hitta Joe Biden, forseta.

Á fundinum í Hvítu húsunum fara forsætisráðharrin og forsetarnir báðir at kjakast um svensku og finsku umsóknina um Nato-limaskap.

Russiska innrásin í Ukraina og viðurskiftini millum londini, nú trygdarpolitiska støðan er broytt, eru eisini á skránni, sigur svenska stjórnin í tíðindaskrivi.

Russiski uttanríkisráðharrin, Sergej Lavrov, sigur, at tað er lítil munur á, um Finnland og Svøríki eru limir í Nato, tí londini hava leingi verið við í hernaðarvenjingum hjá Nato, skrivar Reuters.

Svøríki og Nato-limaskapur, Ann Linde, Svøríki - Mynd: Ritzau Scanpix

Svenski uttanríkisráðharrin, Ann Linde, skrivar undir umsóknina um limaskap í Nato. (Mynd: Ritzau Scanpix)