Rasmus Seebach høvuðsnavn á Summarfestivalinum enn einaferð

Kendan danska poppstjørnan Rasmus Seebach verður høvuðsnavn á Summarfestivalinum í ár enn einaferð, freistast mann at siga. 

Rasmus Seebach hevur framført á Summarfestivalinum tvær ferðir áður, í 2011 2019, umframt at hann eisini framførdi á Tórsfest í 2024. 

Hví koma enn einaferð sleipandi við Rasmusi Seebach, kundi ein spurt?

"Føroyingar fáa ikki nokk av Rasmusi Seebach," tvíhelt Erik Biskupstø, fyriskipari, tá hann kunngjørdi høvuðsnavnið í sendingini Vikuskiftið. 

Soleiðis sá tað út, tá Rasmus Seebach fyrstu ferð framførdi á Summarfestivalinum í 2011. 

Erik Biskupstø, fyriskipara, helt ikki, at tað gjørdi nakað, at Rasmus Seebach enn einaferð er høvuðsnavnið á Summarfestivalinum - heldur ikki, um Seebach eisini framførdi á Tórsfest fyrraárið. 

"Føroyingar fáa ikki nokk av Rasmus Seebach," segði fyriskiparin. 

Hoyr Erik Biskupstø kunngera Rasmus Seebach í sendingini Vikuskiftið:

Fólkakær poppstjørna

Rasmus Seebach er tann stóra og fólkakæra poppstjørnan, sum við fangandi poppsangum savnar fólk í øllum aldri á konsertum og festivalum. 

Rasmus Seebach fekk stóra gjøgnumbrotið við fyrstu útgávuni í 2009, og síðani hevur hann støðugt verið at finna á hitlistum og á stóru pallunum.

Sangir sum “Engel”, “Øde ø”, “Millionær”, “Falder”, “Olivia”, “I mine øjne”, “Under stjernene på himlen” og “Lidt i fem” eru millum hittini, sum tann stóra og breiða fjøldin hevur tikið til sín. 

Í november hevði Rasmus Seebach fimm fullkomiliga útseldar arena-konsertir í Danmark. Tey 75.000 atgongumerkini til Royal Arena og Jysk Bank Boxen vórðu seld eftir stuttari tíð. 

Summarfestival logo

Hvat: Summarfestivalurin
Hvar: Í Klaksvík
Nær: Frá 6. til 8. august.